🌎💥Entrepreneurship ရဲ့ အရေးပါလာမှု

စွန့်ဦးတီထွင်ခြင်းဆိုတဲ့ စကားလုံးကို အခြားနိုင်ငံမှာတင်မကပဲ မြန်မာနိုင်ငံမှာလဲ ပိုမို ရင်းနှီးလာကြပါတယ်။

သတင်းဆောင်းပါးတွေ၊ Forum တွေ၊ Conference တွေမှာ စွန့်ဦးတီထွင်ခြင်းနဲ့ပတ်သက်ပြီး ကျယ်ကျယ်ပြန့်ပြန့် ဆွေးနွေးလာကြသလို စွန့်ဦးတီထွင်လုပ်ငန်းရှင်တွေလည်း တဖြည်းဖြည်းများလာတာကို သတိထားမိကြမှာပါ။
အခုနောက်ပိုင်းဆို Startup Competition တွေလုပ်ပြီး လူငယ်စွန့်ဦးတီထွင်လုပ်ငန်းရှင်တွေ (သို့) ပရောဂျက်တွေကို အားပေးလာကြပါတယ်။
🇲🇲🤓ဒါဆို ဘာကြောင့် စွန့်ဦးတီထွင်လုပ်ငန်းတွေရဲ့ အခန်းကဏက မြန်မာနိုင်ငံမှာ မြင့်တက်လာတာလဲ?

❗️အဓိကကတော့ စွန့်ဦးတီထွင်သူလုပ်ငန်းတွေက နိုင်ငံကို အများကြီး ပြောင်းလဲပေးနိုင်လို့ပါ။

❗️အတိုချုန်းပြောမယ်ဆိုရင် စွန့်ဦးတီထွင်ခြင်းဟာ ပြသနာတွေကို ဖြေရှင်းနိုင်တယ်၊ ပိုတိုးတက်ဖို့ အခွင့်အလမ်းတွေ ဖန်တီးပေးနိုင်တယ်၊ နောက်ပြီး လူနေမှုအဆင့်အတန်းကို ပိုမြှင့်တက်စေနိုင်ပါတယ်။

ဒီအချက်သုံးချက်က မြန်မာနိုင်ငံမှာ လိုအပ်နေတဲ့ အပိုင်းတွေ ဖြစ်တဲ့အတွက်ကြောင့် မြန်မာနိုင်ငံမှာ စွန့်ဦးတီထွင် လုပ်ငန်းရှင်တွေ၊ ပညာရှင်တွေကို လိုကိုလိုအပ်ပါတယ်။

ဒါကြောင့် ဒီနေ့မှာတော့ မြန်မာနိုင်ငံရဲ့ ဘယ်အပိုင်းတွေကို စွန့်ဦးတီထွင်လုပ်ငန်းရှင်တွေက ဘယ်လို ပြောင်းလဲပေးနိုင်လဲဆိုတာကို လေ့လာပါမယ်။ 🤝

📍အလုပ်မလုံလောက်မှု နှင့် အလုပ်ဖန်တီးပေးနိုင်ခြင်း
အရင်ဆုံး စွန့်ဦးတီထွင်လုပ်ငန်းတွင်သာမကပဲ ဘယ်လို လုပ်ငန်းမဆို ဖွင့်တာနဲ့ သူ့ရဲ့ ထုတ်ကုန်တွေ၊ Service တွေ ပေးနိုင်ဖို့ Supplier ၊ Customer နဲ့ ဝန်ထမ်းတွေ ရှာရပါတယ်။ ဒီကနေ Supplier တွေဟာ အလုပ်ပိုတိုးလာပြီး လူတွေလည်း အလုပ်အခွင့်အလမ်းတွေ ပိုတိုးလာပြီး ဆက်စပ်နေတဲ့ လုပ်ငန်းတွေအတွက်လည်း ဝင်ငွေ ပိုရလာစေပါတယ်။

ဥပမာ - အိုင်တီ စွန့်ဦးတီထွင်မှုလုပ်ငန်းတစ်ခု ဖြစ်လာပြီဆိုရင် သူနဲ့ဆိုင်ရာဆိုင်ရာ လုပ်ငန်းတွေဖြစ်တဲ့ Hardware ဆိုင်တွေ၊ Sales & Marketing အလုပ်တွေ စတဲ့လုပ်ငန်းတွေပါ အကျိုးကျေးဇူးရရှိမှာ ဖြစ်ပါတယ်။

ဒါကို တနည်းအားဖြင့် Cascading Effect (သို့) Multiplier Effect လို့လည်း ခေါ်ကြပါတယ်။ လုပ်ငန်းတစ်ခုကနေ အခြား လုပ်ငန်းတွေ၊ ဝန်ထမ်းတွေပေါ် ထပ်ဆင့်အကျိုးသက်ရောက်ပြီး အခွင့်အလမ်းတွေ ဖြစ်ပေါ်စေတာပါ။

မြန်မာနိုင်ငံမှာ လုပ်ငန်းတစ်ခုနဲ့တစ်ခုက တိုးတက်နှုန်း၊ အလုပ်ဖြစ်နှုန်း ကွာဟမှုက ကြီးပါတယ်။ တစ်နှစ်ပတ်အတွင်းမှာ Industry တစ်ခုပေါက်သွားပြီဆိုရင် သူနှင့် ဆိုင်ရာဆိုင်ရာ လုပ်ငန်းတွေပါ ရှင်သန်လာပါတယ်။ တချိန်ထဲမှာပဲ သူနဲ့ မသက်ဆိုင်တဲ့ လုပ်ငန်းတွေ၊ အခြား Industry တွေကတော့ အနည်ထိုင်ပြီး ဝင်ငွေနည်းပါတယ်။ ဒါကြောင့် စွန့်ဦးတီထွင်သူများများ ဖိတ်ခေါ်ခြင်းအားဖြင့် လုပ်ငန်းတွေကို ဝင်ငွေတိုးပြီး အလုပ်နေရာတွေ ဖန်တီးပေးနိုင်ပါတယ်။

📈 Market လိုအပ်မှု နဲ့ Market ချဲ့ထွင်မှု
ကျွန်မတို့ မြန်မာနိုင်ငံရဲ့ အဓိက ဝင်ငွေရှာတဲ့ လုပ်ငန်းတွေက စိုက်ပျိုးရေး၊ ခရီးသွားလုပ်ငန်း၊ ထုတ်ကုန်သွင်းကုန်လုပ်ငန်း၊ ဆက်သွယ်ရေးလုပ်ငန်းတွေ စတာတွေပဲဖြစ်ပါတယ်။ အမှန်ဆိုရင် ဒီလုပ်ငန်းတွေကနေ အမြတ်ဝင်ငွေရှာတာဟာ နိုင်ငံအတွက်လဲ လုံလောက်ကောင်း လုံလောက်ပါလိမ့်မယ်။

ဒါပေမဲ့ ကျွန်မတို့ အခြား နိုင်ငံတွေ ကြည့်မယ်ဆိုရင် သူတို့ရဲ့ ဝင်ငွေဝင်တဲ့အပိုင်းတွေဟာ အများကြီးရှိပါတယ်။ များသောအားဖြင့် ရနိုင်သလောက် ငွေဝင်ပေါက်တွေကို ဆုတ်ကိုင်ထားကြပါတယ်။ ဒီလိုခြေလှမ်းလှမ်းထားတာက နိုင်ငံစီးပွားရေးတောင့်တင်းဖို့တင်မကပဲ နိုင်ငံကို ဘေးကင်းလုံခြုံစေဖို့လဲပါပါတယ်။

❗️ဘယ်လို လုံခြုံစေတာလဲ ကျွန်မတို့စဉ်းစားကြည့်ရအောင်။

ပြင်ပသက်ရောက်မှုတွေဖြစ်တဲ့ သဘာဝဘေးအန္တရာယ်တို့၊ ကပ်ဘေးအန္တရာယ်၊ စစ်ဘေးအန္တရာယ်တွေ၊ နိုင်ငံတကာ ဆက်ဆံရေး ပျက်တောက်မှုတွေက ဘယ်အချိန်ဝင်လာမလဲဆိုတာ ခန့်မှန်းရခက်ပါတယ်။🧐

ဥပမာ - အခုလို COVID-19 ကူးစက်ရောဂါကြောင့် ခရီးသွားလုပ်ငန်းတွေ အထိနာကြပါတယ်။ ဒီလိုအချိန်မှာ ခရီးသွားလုပ်ငန်းက အဓိက ဝင်ငွေပေါက်ဖြစ်တဲ့ ကျွန်မတို့လို နိုင်ငံတွေမှာ ဘာတွေဖြစ်လဲဆိုရင် နိုင်ငံသားအများစုတွေ အလုပ်လက်မဲ့ဖြစ်သွားပြီး၊ ဝင်ငွေတွေ ပြတ်တောက်သွားလို့ ခရီးသွားလုပ်ငန်းရှင်တွေရော၊ သူ့ရဲ့ ဆိုင်ရာလုပ်ငန်းတွေပါ တောင့်မခံနိုင်တော့ပဲ နောက်ဆုံး နိုင်ငံရဲ့ အဓိကဝင်ငွေတစိတ်တပိုင်း ပြတ်ထွက်သွားပါတယ်။❌

ဒါကြောင့် နိုင်ငံတစ်နိုင်ငံမှာ ဝင်ငွေဝင်တဲ့ လုပ်ငန်းအနည်းစုကို မှီခိုအားထားတာထက်စာရင် ကိုယ်တတ်နိုင်သလောက် လုပ်ငန်းတွေကို ဖြန့်ကြက်ထားပြီး ရေရှည်ရပ်တည်နိုင်အောင် လုပ်ပေးခြင်းက အရမ်းအရေးကြီးပါတယ်။ မြန်မာနိုင်ငံဟာဆိုရင် အခုပြောသွားတဲ့ နိုင်ငံမျိုးအစားထဲမှာ ပါဝင်တဲ့အတွက် အနာဂတ်မှာ မိမိနိုင်ငံကို ဘယ်လိုအခက်အခဲတွေမှမဆို ခံနိုင်ရည်ရှိစေဖို့ ပြင်ထားသင့်ပါတယ်။
ဒီလို ပြင်ဆင်ဖို့ အကောင်းဆုံး ယန္တရားကတော့ စွန့်ဦးတီထွင်လုပ်ငန်းတွေပဲဖြစ်ပါတယ်။🙋🏻‍♀️

စွန့်ဦးတီထွင်လုပ်ငန်းတွေဟာ သူ့နာမည်အတိုင်းပဲ အခုထိ မလုပ်ဖူးတဲ့ အကြံညဏ်ကိုယူပြီး Niche Market ကို ထိုးဖောက်တာပါ။

ဒါကြောင့် နိုင်ငံအတွင်းမှာ အလုပ်နည်းသေးပေမဲ့ အလုပ်ဖြစ်နိုင်တဲ့ ရှိပြီးသား Market (သို့) လုံးဝ မလုပ်ဖူးပေမဲ့ ဖြစ်နိုင်ချေရှိတဲ့ Market အသစ်တွေကို ချဲ့ထွင်နိုင်ပါတယ်။ ဒီလို စွန့်ဦးတီထွင်လုပ်ငန်းတွေကို ကြိုဆိုပြီး ရင်းနှီးမြုပ်နှံပေးမယ်ဆိုရင် နောက်ပိုင်း ပြင်ပအန္တရာယ်တွေ ဝင်လာခဲ့ရင်တောင် ပိုခံနိုင်ရည်ရှိသွားပြီး နိုင်ငံရဲ့ ဝင်ငွေနဲ့ စီးပွားရေးလည်း ပိုတောင့်တင်းလာနိုင်ပါတယ်။

📍ပညာရှင် မလုံလောက်မှုနဲ့ ပညာရှင်ဖန်တီးနိုင်မှု

စွန့်ဦးတီထွင်သူတွေမှာ လုပ်ငန်းရှင်တွေကိုပဲ ဆိုလိုလို့မရပါဘူး။ နယ်ပယ်တစ်ခုမှာ ထူးချွန်တဲ့ ပညာရှင်တွေလည်း ဖြစ်နိုင်ပါတယ်။ အခြားဖွံ့ဖြိုးပြီးသား နိုင်ငံတွေကို ကြည့်မယ်ဆိုရင် သက်ဆိုင်ရာနယ်ပယ်မှာ ထူးချွန်သူတွေက ဖန်တီးလိုက်တဲ့ စက်ပစ္စည်းတွေ၊ အိုင်ဒီယာတွေကြောင့် နိုင်ငံရဲ့ အနှစ်နှစ်အလလချီနေတဲ့ ပြသနာတွေ၊ လိုအပ်ချက်တွေကို ဖြေရှင်းလိုက်နိုင်ပါတယ်။ 👏🏻

‍🎓ကျွန်မတို့ မြန်မာနိုင်ငံမှာ အားနည်းတာက အဲ့ဒါပါ ။ ပညာရှင်အလုံအလောက်မရှိတာ။ စီးပွားရေးပိုင်းမှာတော့ ထိုက်သင့်သလောက် ကျွမ်းကျင်သူတွေ ရှိပေမဲ့လည်း အခြားအရေးကြီးတဲ့ နယ်ပယ်တွေဖြစ်တဲ့ စိုက်ပျိုးရေး၊ ကျန်းမာရေး၊ သဘာဝပတ်ဝန်းကျင် ထိန်းသိမ်းရေး၊ ပညာရေး စတဲ့ အပိုင်းတွေမှာ ပညာရှင်တွေ လိုအပ်နေပါသေးတယ်။

ဒီလို ဖြစ်ရခြင်းရဲ့ အဓိကအကြောင်းအရင်းကတော့ စားဝတ်နေရေးကြောင့်ပါ။ ကျွန်မတို့ မြန်မာနိုင်ငံမှာ ဝါသနာနဲ့ စားဝတ်နေရေး ရွေးပါဆိုရင် စားဝတ်နေရေးကို ရွေးရပါတယ်။ ကိုယ့်ရဲ့ စားဝတ်နေရေးကို ပြေလည်စေမဲ့ လမ်းကြောင်းကို အများစုက ရွေးချယ်ကြပါတယ်။ 😔

အထက်တန်းပြီးလို့ တက္ကသိုလ်တက်ပြီဆိုလည်း အနာဂတ်မှာ ကိုယ့်အတွက် ဝင်ငွေအလုံအလောက် ရှာပေးနိုင်မဲ့ ပညာရေးကိုသာ ရွေးချယ်ကြပါတယ်။
ဒီအခါမှာ လက်ငါးလုံးမပြည်းတဲ့ ထိပ်တန်းကျောင်းတွေကိုပဲ တက်ချင်တာများကြပြီး ရွေးချယ်မှုမရှိလို့ တခြားကျောင်းတွေ တက်ရတယ်ဆိုရင်တောင် နောက်ဆုံး ဒီ စီးပွားရေးပိုင်းတွေပဲ ပြန်အလုပ်ဝင်လုပ်ကြပါတယ်။
ဒါကလည်း လူငယ်တွေရဲ့ အမှားမဟုတ်ပါဘူး။ ဖြစ်နေတဲ့ အခြေအနေမှာ သူတို့အတွက် အကောင်းဆုံးသော ဆုံးဖြတ်ချက်ကို ချရတာပါ။ ❗️

ဒါပေမဲ့ ဒီလို အများစုက ဆုံးဖြတ်တဲ့အခါ Industry အနည်းစု Business, Marketing, Sales စတဲ့အပိုင်းမှာ လူအများကြီးစုနေပြီး အခြား Sector တွေမှာ လူအင်အားအလုံအလောက်မရှိဖြစ်သွားပါတယ်။
ကိုယ်ဝါသနာပါတဲ့ အလုပ်တွေဟာ ဝင်ငွေအလုံအလောက်မရနိုင်ဘူး။ တက်လမ်းလည်းမရှိဘူး။ ဒီလို အကြောင်းပြချက်တွေကြောင့် အများစုဟာ တက်လမ်းရှိပြီး ဝင်ငွေပိုရနိုင်မဲ့ Industry တွေမှာပဲ အလုပ်ဝင်ကြပါတယ်။ 🙋🏻‍♀️

တဘက်မှာ လုပ်အားလခအများကြီး မပေးနိုင်တဲ့ Industry တွေကတော့ ဝါသနာအရင်းခံတဲ့ လူအင်အားတွေ တွေ ဆုံးရှုံးပြီး မတိုးတက်ပါဘူး။ ဒီလိုနဲ့ လုပ်အားလခကို မက်လောက်စရာ ပမာဏအထိ တိုးမပေးနိုင်၊ အဲ့လိုနဲ့ ဝါသနာအရင်းခံတဲ့ လူအင်အားတွေ မရပဲ မပြီးဆုံးနိုင်တဲ့ သံသရာမှာ လည်ပတ်နေကြပါတယ်။

ဒီနေရာမှာ နိုင်ငံတော်က ဝင်ဦးစီးပြီးတော့ မဖွံ့ဖြိုးသေးတဲ့ Industry တွေမှာ ရင်းနှီးမြုပ်နှံပြီး စွန့်ဦးတီထွင်လုပ်ငန်းရှင်တွေကို ဖိတ်ခေါ်ရပါတယ်။ ဒီကနေတဆင့် တဖြည်းဖြည်း Industry က တိုးတက်လာပြီဆိုရင် လူငယ်တွေရဲ့ နားထဲမှာ ငါတို့ဝါသနာနောက်လိုက်လို့ အဆင်ပြေတယ်ဆိုတဲ့ အဆင့်ထိကို တိုးတက်အောင် လုပ်ပေးရပါတယ်။
အဲ့ဒီ့ကနေမှ တဖြည်းဖြည်း ပညာရှင်တွေ ထွက်ပေါ်လာမှာ ဖြစ်ပါတယ်။ ဒီလိုနည်းနဲ့ Industry တွေအများကြီး သူ့နှုန်းနဲ့ သူတိုးတက်လာမယ်ဆိုရင် တဖက်မှာလည်း နိုင်ငံရဲ့ စီးပွားရေးအင်အားတောင့်တင်းလာမှာဖြစ်ပါတယ်။💪🏼

📍လူမှုရေး၊ စီးပွားရေး၊ သဘာဝ ပတ်ဝန်းကျင်ပိုင်းတွေမှာ လူသားတွေရဲ့ နေထိုင်မှုကို ပိုအဆင်ပြေလာစေနိုင်ပြီး ပြသနာတွေကို ဖြေရှင်းချက်ထုတ်ပေးပါတယ်

ကျွန်မတို့ မြန်မာနိုင်ငံမှာ နယ်ပယ်အသီးသီးမှာ လိုအပ်ချက်တွေ ပြသနာတွေ ရှိပါတယ်။

ဥပမာ - အမှိုက်ကို မီးရှို့တာတို့၊ သစ်ပင်ခုတ်တာတို့၊ လေထုညစ်ညမ်းခြင်း၊ နည်းပညာကို လုံခြုံစိတ်ချစွာ အသုံးမချတတ်ခြင်း၊ မြို့ပြနှင့်နယ်ဘက်တွေရဲ့ ကွာဟမှုတွေစတဲ့ ကျန်းမာရေးနဲ့ မညီညွှတ်တဲ့ နည်းတွေနဲ့ ဖြေရှင်းနေတာတွေ အများကြီးရှိပါတယ်။

စွန့်ဦးတီထွင်လုပ်ငန်းတွေရဲ့ Main Objective က လိုအပ်ချက်(သို့) ပြသနာတစ်ခုကို ဖြေရှင်းတာပါ။ ⭕️

ဥပမာတစ်ခုကတော့ Mobile Banking ပါ။ ❗️ရန်ကုန်နဲ့ယှဉ်ရင် နယ်ဘက်ကသူတွေဟာ Wave Money ကို အသုံးများကြပါတယ်။

ဒါဟာဘာလို့လဲဆိုရင် ဝေးခေါင်တဲ့ နယ်စွန်နယ်ဖျားမှာ အလုပ်လုပ်နေရတဲ့ တောင်သူလယ်သမားတွေအတွက် ဘဏ်အထိသွားစရာမလိုပဲ အချိန်ကုန်၊ လူသက်သာစွာ ငွေလွှဲ၊ ငွေထုတ် လုပ်လို့ရလို့ ဖြစ်ပါတယ်။
ထိုနည်းတူ ကျွန်မတို့ နိုင်ငံမှာ ဖြည့်ဆည်းသင့်တဲ့ ကွာဟချက် တွေ အများကြီးရှိပါတယ်။ ဒါတွေကို နှစ်ဦးနှစ်ဖက် အဆင်ပြေအောင် လုပ်ယူနိုင်တာက စွန့်ဦးတီထွင်ခြင်းပါ။ ဒါကြောင့် စွန့်ဦးတီထွင်ခြင်းကို မြန်မာနိုင်ငံမှာ အားပေးသင့်တာပါ။ လိုလည်းလိုအပ်ပါတယ်။ 👍🏻

📍နောက်ဆုံးအနေနဲ့ စွန့်ဦးတီထွင်ခြင်းကို မြန်မာနိုင်ငံမှာ အကောင်အထည်ဖော်မယ်ဆိုရင် အရေးကြီးဆုံးလိုအပ်ချက်တစ်ခု ရှိပါသေးတယ်။
နိုင်ငံတော်ဘက်ကနေ ပွင့်လင်းမြင်သာတဲ့ စည်းမျဉ်းစည်းကမ်းတွေ ကို ချမှတ်ဖို့လိုပြီး မလိုလားအပ်တဲ့ အကျိုးဆက်တွေ မဖြစ်အောင်လည်း ကြည်းကြပ်ပေးဖို့ လိုအပ်ပါတယ်။
ဒါမှသာ လုပ်ငန်းကို ကောင်းမွန်စွာ လည်ပတ်နိုင်ပြီး ရည်မှန်းထားတဲ့ အကျိုးကျေးဇူးတွေ ခံစားရမှာဖြစ်ပါတယ်။ ✨

Written by
Ei Myatnoe Aung

Reference: https://www.investopedia.com/articles/personal-finance/101414/why-entrepreneurs-are-important-economy.asp

https://www.weforum.org/agenda/2015/11/why-we-should-champion-entrepreneurs-in-developing-countries/