SWOT Analysis ဆိုတာ ဘာလဲ .. 🧐

စီးပွားရေးလုပ်ငန်းတစ်ခုကို စတင်တည်ထောင်ပြီဆိုတာနဲ့ လုပ်ငန်းရဲ့ အတွင်း၊ အပြင်ဘက်က အကြောင်းအရာတွေကို အမြဲလေ့လာနေဖို့လိုပါတယ်။ ဒါကြောင့် စီးပွားရေးမှာ အရေးကြီးတဲ့ PESTLE Analysis အကြောင်းလည်းပြောပြခဲ့ပြီးပါပြီ။ ✨

ဒီနေ့ပြောပြမှာကတော့ SWOT Analysis အကြောင်းပါ။👏

ဒီလိုလေ့လာဆန်းစစ်မှုတွေဟာ business planning နဲ့ decision makingအတွက် အရမ်းအရေးပါတဲ့ အစိတ်အပိုင်းတွေ ဆိုရင်လည်းမမှားပါဘူး။

တစ်ဦးတစ်ယောက်ပဲဖြစ်ဖြစ်၊ အဖွဲ့အစည်းပဲဖြစ်ဖြစ် ပြဿနာတွေကို ကိုင်တွယ်ဖြေရှင်းရတဲ့အခါ ဒီနည်းလမ်းဟာ နားလည်ရလွယ်ပြီးတော့ အောင်မြင်မှုအခွင့်အလမ်းတွေပိုရလာနိုင်ပါတယ်။🥳

SWOT ဆိုတာကတော့

👉ကိုယ့်လုပ်ငန်း(သို့) ကိုယ်နဲ့ တိုက်ရိုက် သက်ဆိုင်နေတဲ့ Strengths (အားသာချက်များ)၊

Weaknesses (အားနည်းချက်များ) နဲ့
👉လုပ်ငန်းအပြင်ဘက်က သက်ရောက်မှုတွေဖြစ်တဲ့ Opportunities (အခွင့်အလမ်းများ)၊ Threats (ခြိမ်းခြောက်မှုများ) ပဲဖြစ်ပါတယ်။

💢Strengths (အားသာချက်များ)

ကိုယ့်အဖွဲ့အစည်းက သူများတွေနဲ့ မတူပဲ ပိုကောင်းအောင် ဝန်ဆောင်မှုတွေပေးနိုင်တာကို
အားသာချက်လို့ ခေါ်ပါတယ်။🤗

ဥပမာ- ကိုယ့်လုပ်ငန်းတည်နေရာက လူသွားလူလာများတဲ့နေရာမှာ တည်ရှိနေတယ်ဆိုရင် လူအများသတိထားမိလာတာတွေ၊ သွားလာရေး လွယ်ကူတာတွေစတဲ့ အားသာချက်တွေရှိပါတယ်။

ကိုယ့်ရဲ့အားသာချက်ကို သိအောင်လုပ်ရပါမယ်။ အဲ့အခါမှာ ကိုယ့်အဖွဲ့အစည်း အင်္ဂါရပ်နဲ့ ပြိုင်ဘက်တွေရဲ့ အားသာချက်ကိုလည်း နှိုင်းယှဉ်ကြည့်ဖို့ လိုအပ်ပါတယ်။

ဒါမှလည်း ကိုယ့်ရဲ့ လိုအပ်ချက်၊
ထူးခြားချက်တွေကို အလွယ်တကူတွေ့လာနိုင်မှာပါ။ ဝန်ထမ်းတွေ အရည်အချင်းနဲ့ကျွမ်းကျင်မှု၊ လုပ်ငန်းတွင်း ဆက်ဆံမှုတွေ၊ ထုတ်ကုန် အရည်အသွေး စတာတွေနဲ့ ပက်သက်ပြီး ကိုယ့်ဘက်က ဆန်းစစ်ရပါမယ်။

ကိုယ့်ရဲ့ အားသာချက်ကို သိသွားပြီဆိုရင် ပိုတိုးတက်အောင်စွမ်းဆောင်ဖို့လိုလာပါပြီ။🥇

💢Weaknesses (အားနည်းချက်များ)

ဒါကတော့ ပြိုင်ဘက်တွေနဲ့ယှဉ်ရင် ကိုယ့်ဘက်ကလိုအပ်ချက်ဖြစ်နေတဲ့အရာတွေပါပဲ။

ဥပမာ- အပေါ်မှာ ပြောခဲ့သလို တည်နေရာက အားသာချက်ရှိနေပေမယ့် ကိုယ့်လုပ်ငန်းကို ချေးငွေနဲ့စတင်ခဲ့ရတာမျိုး၊ Equipment ပိုင်းဆိုင်ရာ လိုအပ်ချက်မျိုးတွေ ဖြစ်ပါတယ်။

လုပ်ငန်းတွင်း ဆက်ဆံတဲ့အခါ တစ်ဦးနဲ့တစ်ဦး ကွာဟချက်ဖြစ်နေတာတွေလည်း သိထားရပါမယ်။🤔

အားနည်းချက်တွေသိပြီဆိုရင် အနည်းဆုံးဖြစ်အောင် ကိုယ့်ဘက်ကလုပ်ဆောင်ဖို့လိုလာပါပြီ။

ဒီအားသာချက်၊ အားနည်းချက်တွေကို သေချာကိုင်တွယ်ဖြေရှင်းဖို့လိုပါတယ်။ အားသာချက်ကိုရှာမတွေ့ပဲ ပိုကောင်းအောင် မစွမ်းဆောင်နိုင်ရင် အားနည်းချက်ဖြစ်သွားတတ်သလို အားနည်းချက်တွေကိုလည်း အနည်းဆုံးဖြစ်အောင် မလျှော့ချဘဲ အရင်တိုင်းဆက်သွားနေရင်လည်း ဆုံးရှုံးမှုတွေဖြစ်လာနိုင်ပါတယ်။🤷

ဒါကြောင့် အဓိက ကတော့ strengths နဲ့ weaknesses တွေကို သိအောင်လုပ်ဖို့ပါပဲ။

💢Opportunities (အခွင့်အလမ်းများ)

လုပ်ငန်းနယ်ပယ်မှာ ရတဲ့တိုးတက်မှု အခွင့်အလမ်းတွေကို strength နဲ့ပေါင်းစပ်ပြီး ကြိုးစားဖို့လည်းလိုပါတယ်။👏

ပတ်ဝန်းကျင်‌ပြောင်းလဲမှု‌တွေက ကိုယ့်လုပ်ငန်းအပေါ်သက်ရောက်‌မှု၊ ဒီပြောင်းလဲမှုတွေကနေ အကျိုးကျေးဇူးရရှိလာမှုတွေ၊ ပြိုင်ဘက်နည်းပါးမှု ဒီအခွင့်အရေးတွေကို သေချာဖမ်းဆုပ်ဖို့လိုပါတယ်။

ကိုယ့်အတွက် တိုးတက်ဖို့ အခြေအနေဖန်တီးအခါ ရတဲ့အခွင့်အရေးကို အသုံးချပြီး ကိုယ့်ရဲ့ ထုတ်ကုန်နဲ့ဝန်ဆောင်မှု အောင်မြင်အောင် ဖန်တီးရမှာဖြစ်ပါတယ်။🤝

ဥပမာ‌ဆိုရင် ခုလို stay home ကာလက အွန်လိုင်းပေါ်ကနေ အလုပ်လုပ်နိုင်တဲ့ digital tools တွေကိုလေ့လာဖို့ အချိန်တစ်ခုအနေနဲ့ အခွင့်အရေးရရှိသလိုမျိုးပါပဲ။ ရတဲ့အချိန်မှာ သေချာအသုံးချပြီးတိုးတက်မယ့် နည်းလမ်းတွေ ရှာရပါမယ်။

💢Threats (ခြိမ်းခြောက်မှုများ)

ဒါကတော့ ကိုယ့်လုပ်ငန်းကို ရလဒ်ကောင်းရဖို့ အတားအဆီးဖြစ်နေတဲ့ အရာတွေပါ။

ငွေကြေးလည်ပတ်ဖို့ ငွေအလုံအလောက်မရှိတာတွေ၊ လုပ်ငန်းတူပြိုင်ဘက် များပြားလာတာတွေနဲ့ ဝယ်ယူသူတွေရဲ့ အလေ့အထ၊စိတ်ဝင်စားမှု ပြောင်းလဲလာတွေက လုပ်ငန်းအပေါ် negative effects တစ်ချို့သက်ရောက်စေတာမို့လို့ အစီအစဉ်တွေ သေချာရေးဆွဲပြီး ဆုံးဖြတ်ချက်ချဖို့လိုပါတယ်။🙌🏻

ပတ်ဝန်းကျင်ပြောင်းလဲမှုကြောင့် ဖြစ်လာတဲ့ ခြိမ်းခြောက်တားဆီးမှုတွေကို မထိန်းချုပ်နိုင်ပေမယ့် ရင်ဆိုင်ဖို့အကောင်းဆုံးနည်းလမ်းတွေ စဉ်းစားရမှာပါ။

တစ်ခါတ‌စ်လေကိုယ့်ရဲ့ Weakness ကလည်း threat ဖြစ်သွားနိုင်တာမို့လို့ အားနည်းချက်တွေကို အနည်းဆုံးဖြစ်အောင်လုပ်ဖို့ ပြောခဲ့တာပါ။🙋

စီးပွားရေးအောင်မြင်မှုအတွက် SWOT analysis က အရေးပါသလိုPersonal development အတွက်လည်း အသုံးဝင်ပါတယ်။👏

ဒီလိုမျိုး ဆန်းစစ်မှုတွေ ပြုလုပ်ပြီးတော့ အချိန်တိုအတွင်း ကိုယ့်ရဲ့ စွမ်းရည်နဲ့ လိုအပ်ချက်တွေသိလာစေတယ်။

အဲ့အခါ ကိုယ့်ရဲ့အားသာချက်တွေနဲ့ ကိုက်ညီတဲ့ အခွင့်အလမ်းတွေကိုဖမ်းဆုပ်တတ်စေပြီးအားနည်းချက်ကြောင့်ဖြစ်လာမယ့် စိန်ခေါ်မှုတွေကိုလည်း ရင်ဆိုင်နိုင်ဖို့ မှန်ကန်တဲ့ဆုံးဖြတ်ချက်တွေ ချလာနိုင်ပါတယ်နော်။🥰

Written by
Yoon Ei Tin