What is business incubator?

💼အခုတလောမှာ တော်တော်များများ တနိုင်တပိုင် လုပ်ငန်းတွေ လုပ်လာကြတာကို တွေ့ရပါတယ်။ ကိုယ်တတ်ကျွမ်းထားတဲ့ ပညာတွေကို အခြေခံပြီး စီးပွားရေးတွေ လုပ်လာကြတာကို မြင်မိပါတယ်။

ခက်တာက ကျွန်မတို့မှာ လုပ်ငန်းလုပ်ဖို့ Idea ကောင်းတစ်ခုရှိပြီဆိုတာနဲ့ I have an apple, I have a pen. Apple Pen ဆိုပြီး ချက်ချင်းကြီး ကိုယ့်လုပ်ငန်းက ရုပ်လုံးပေါ်လာတာမဟုတ်ပါဘူးနော်။ 😆

📥ကိုယ်လုပ်မဲ့ Idea ရဲ့ Scale ပေါ် မူတည်ပြီးတော့ အရင်းအနှီးရှိရပါမယ်။ ရုံးနေရာရှာရပါမယ်၊ ကိုယ့် Product တွေ ထုတ်ဖို့ Supplier တွေ နဲ့ ဒီ Product တွေကို ရောင်းချဖို့ Customer တွေ၊ ကိုယ်စားလှယ်တွေ ရှာ၇ပါမယ်၊ နောက်ပြီး ဝန်ထမ်းတွေကို ခန့်ရပါမယ်၊ စစ်တမ်းတွေ ကောက်ပြီး Demand တွေ၊ Trend တွေကို လေ့လာရပါဦးမယ်။

ဒါ့အပြင် နောက်ပိုင်း လုပ်ငန်းတိုးချဲ့ဖို့အတွက်ကို ရင်းနှီးမြုပ်နှံသူကိုလည်း ရှာရင်ရှာရပါအုံးမယ်။ ကိုယ်က Idea တစ်ခုကိုသာ လက်ကိုင်ထားပြီး စီးပွားရေးတစ်ခုကို ဘယ်လို Jumpstart ရမလဲ မသိဘူးဆိုရင် ပိုလို့တောင် မေးစရာတွေ ရှိလာနိုင်ပါတယ်။

❗️ဒါကြောင့် ဒီနေ့မှာ Idea ကောင်း တစ်ခုကို လက်ကိုင်ထားပြီး ကိုယ့်တစ်ကိုယ်ထဲအားနဲ့ လုပ်ငန်းတစ်ခုကို မထူထောင်နိုင်သေးတဲ့သူတွေအတွက် အကူအညီဖြစ်စေမဲ့ Resource တစ်ခုနဲ့ မိတ်ဆက်ပေးချင်ပါတယ်။

ဒီ Resource ကတော့ Business Incubator တွေပဲ ဖြစ်ပါတယ်။

🐣Business Incubator ဆိုတာဘာလဲ၊
Business Incubator ဆိုတာ ကိုယ့်ရဲ့ Startup Idea လေးကို လုပ်ငန်းတစ်ခုအဖြစ် ပြောင်းလဲနိုင်အောင် အစပိုင်းမှာ လိုအပ်တဲ့အရာတွေနဲ့ ပတ်သက်ပြီး ကူညီတဲ့ လုပ်ငန်းတစ်ခုဖြစ်ပါတယ်။

⏭Business Incubator ရဲ့ အခြား နာမည်များ

အချို့နိုင်ငံတွေမှာ Business Incubator အပြင် Business Accelerator ဆိုပြီး သက်သက်လုပ်ငန်းတွေလည်း ရှိပါတယ်။ သူတို့နှစ်ခုရဲ့ ကွာခြားချက်ကို ပြောပါဆိုရင် Business Incubator က လုပ်ငန်းတစ်ခုရဲ့ အစပိုင်းမှာ Assist လုပ်ပေးပြီး Business Accelerator တွေကတော့ အဲ့ဒီ့လုပ်ငန်းက အတန်သင့် ရပ်တည်လာနိုင်ပြီး Beginning Phase ကို ဖြတ်ကျော်လာပြီဆိုရင် ကူညီပေးတဲ့ လုပ်ငန်းဖြစ်ပါတယ်။

သူတို့နှစ်ခုရဲ့ Services တွေကတော့ အမှန်တော့ ခပ်ဆင်ဆင်ပါပဲ။ ဒါကြောင့် ကျွန်မတို့ မြန်မာနိုင်ငံမှာဆိုလည်း Business Incubator နဲ့ Business Accelerator ဆိုပြီး ခွဲပြီး သတ်မှတ်လေ့မရှိပါဘူး။ Business Incubators တွေကို Entrepreneur Hub လို့လည်း ပြောင်းလဲ ခေါ်ဝေါ်တတ်ကြပါတယ်။ သူတို့သုံးခုလုံးရဲ့ တူညီတဲ့အချက်ကတော့ Startup Company လေးတွေကို အလုပ်နေရာ နဲ့ Mentorship ပေးတဲ့ လုပ်ငန်းတွေ ဖြစ်ပါတယ်။

🇲🇲မြန်မာနိုင်ငံထဲက နာမည်ကြီး Business Incubator များ
1) Impact Hub Yangon
2) Dana Facitlity
3) Phandeeyar
4) Idealab Myanmar
5) Seedspace Yangon တို့ပဲဖြစ်ပါတယ်။

🐣Business Incubator အမျိုးအစားများ

Business Incubator တွေမှာ Government လက်အောက်က ရှိသလို Private Incubators တွေလည်း ရှိကြပါတယ်။ တချို့ နိုင်ငံတွေမှာဆို တက္ကသိုလ်တွေကနေ ဦးဆောင်ပြီးလုပ်တဲ့ Business Incubator တွေလည်း ရှိပါတယ်။

အချို့ Business Incubator တွေဆိုရင် လုပ်ငန်းကြီးတွေရယ်၊ အစိုးရရယ်၊ နိုင်ငံတကာ အဖွဲ့အစည်းတွေ ပူးပေါင်းပြီး ဖွဲ့စည်းထားတာလည်း ရှိပါတယ်။ ဥပမာ - Seedspace Yangon လို လုပ်ငန်းမျိုးပါ။ ဒီလို လုပ်ငန်းတွေမှာ အချို့က လုပ်ငန်းတွေကို စိစစ်ပြီး လျှောက်လွှာနဲ့ လက်ခံတာရှိသလို အခကြေးငွေယူပြီး Service ပေးပါတယ်။

နောက်ပြီး Business Incubator တွေမှာ သူတို့ရဲ့ အထူးပြုတဲ့ Sector အလိုက် ခွဲထားတာမျိုးလည်း ရှိကြပါတယ်။ ဒီလိုပဲ Startup idea အကုန်လုံးကို လက်ခံတဲ့ Business Incubator အမျိုးအစားတွေလည်း ရှိပါတယ်။
ဥပမာ - Phandeeyar ဆိုရင် အဓိက နည်းပညာနဲ့ဆိုင်တဲ့ StartUp idea တွေကိုသာ လျှောက်လွှာလက်ခံပါတယ်။

🤝Business Incubator တွေကပေးတဲ့ Service ၄ မျိုး

📍 Office Space and Equipment Sharing 🏢
Business Incubator တွေမှာ ကျွန်မတို့ရနိုင်တဲ့ Service တွေထဲက တစ်ခုကတော့ Office Space Sharing ပါ။ လုပ်ငန်းတစ်ခု စတင်ပြီဆိုရင် စရိတ်အကြီးဆုံးတွေထဲကတစ်ခုက ရုံးနေရာငှားရတာပါ။

ဒီလို စရိတ်ကို အစပိုင်းမှာ သက်သာချင်ရင်တော့ Business Incubator တွေဆီမှာ အခြား တက်သစ်စလုပ်ငန်းတွေနဲ့ တူတူ Office Sharing လုပ်လို့ရပါတယ်။ နောက်ပြီး Business Incubator တွေမှာက နေရာတစ်ခုထဲ Sharing လုပ်ရုံတင်မကဘူး ရုံးသုံးပစ္စည်းတွေလည်း ဝေမျှအသုံးပြုလို့ရတဲ့အတွက် စရိတ်အတော်များများကို လျော့ကျစေမှာပါ။ ဒီလိုစရိတ်တွေကို လျှော့ချလိုက်တာက လုပ်ငန်းကို စတင်ထူထောင်ချိန်မှာ ဝန်ထုပ်ဝန်ပိုးလျော့နည်းစေနိုင်ပါတယ်။

📍 Networking Opportunities👥

Business Incubator တွေရဲ့ ရည်မှန်းချက်တွေထဲက တစ်ခုကတော့ လုပ်ငန်းရှင်တွေကို Networking လုပ်စေချင်တာပါ။ Office ဝေမျှသုံးရသလို အချိန်တော်တော်ကြာအောင် အတူရှိနေတဲ့အတွက် ကိုယ့်လို အခြားလုပ်ငန်းရှင်တွေနဲ့လည်း သိခွင့်ရသလို အချို့ Business Incubator မှာဆိုရင် အပတ်စဉ် Conference တွေ၊ Knowledge Sharing တွေ၊ Class လေးတွေ လုပ်ပေးတဲ့အတွက် အချင်းချင်း စကားပြောပြီး ပူးပေါင်းလုပ်ကိုင်ဖို့ အခွင့်အရေးတွေ၊ အကူအညီတွေ ပေးနိုင်၊ရနိုင့်ပါတယ်။ ဒါတွေကတော့ Business Incubator ရဲ့ ကောင်းကွက်တွေထဲကတစ်ခုပါပဲ။

📍 Business-related Coaching and Mentorship 👨‍🏫

လုပ်ငန်းတစ်ခုကို တကယ့်တကယ်စလုပ်တော့မယ်ဆိုရင် မေးစရာတွေ အများကြီး ရှိလာမှာပါ။ ကိုယ့်လုပ်ငန်းနဲ့ပတ်သက်တဲ့ အရာတွေကို မသိနားမလည်တာမျိုးရှိနိုင်သလို လုပ်ငန်းတွေရဲ့ ယေဘုယျ လုပ်ငန်းဆောင်တာတွေနဲ့ ပတ်သက်ပြီး အကူအညီ လိုတာမျိုးတွေ ဖြစ်လာမှာပါ။

Business Incubator တွေမှာ ဆိုရင် ဒီလို ပြသနာတွေကို ဖြေရှင်းပေးနိုင်တဲ့ Mentorship နဲ့ Coaching Access တွေလဲ ရှိတဲ့အတွက် မိမိလုပ်ငန်းအတွက် အကူအညီရစေမှာပါ။

📍 Investment Opportunities💵
Business Incubator အားလုံးတော့မဟုတ်ပေမဲ့ Business Incubator တော်တော်များများမှာ ရင်းနှီးမြုပ်နှံသူတွေနဲ့ ချိတ်ပေးတာမျိုးတွေ၊ Information Share ပေးတာမျိုးတွေ လုပ်ပေးပါတယ်။

ဒါကြောင့် ကိုယ့်လုပ်ငန်းမှာ အရင်းအနှီးလိုအပ်ပြီး ဘယ်ကနေ ရင်းနှီးမြုပ်နှံသူတွေ ရှာရမှန်းမသိဖြစ်နေတယ်ဆိုရင် Business Incubator တွေကို တီးခေါက်ကြည့်သင့်ပါတယ်။

ဒါကြောင့် ကိုယ့်ရဲ့ Idea ကောင်းလေးတစ်ခုကို လုပ်ငန်းတစ်ခုအဖြစ် အကောင်အထည်ဖော်ချင်တယ်ဆိုရင် Business Incubator တွေနဲ့ အလုပ်တွဲလုပ်တာလည်း မဆိုးတဲ့ Idea တစ်ခုလို့ မြင်ပါတယ်။

ဒါပေမဲ့လည်း ဆုံးဖြတ်ချက်မချခင်မှာ ကိုယ်လုပ်ချင်တဲ့ လုပ်ငန်းရဲ့ လိုအပ်ချက်ကို သေချာသိသင့်ပါတယ်။ တကယ်လိုအပ်မှ လုပ်တာက ဘယ်အရာမဆို စိတ်ချရတဲ့အတွက်ပါ။

Written by
Ei Myatnoe Aung

Reference : https://www.entrepreneur.com/encyclopedia/business-incubator