Design Thinking Process 💭

Design Thinking ဟာဆိုရင် ခက်ခဲတဲ့ပြဿနာတွေနဲ့ ရင်ဆိုင်နေရသူ ဒါမှမဟုတ် တစ်ခုခုကို တီထွင်ဖို့ ပြုလုပ်တဲ့အခါမှာ အသုံးပြုသူရဲ့ အမြင်ဘက်ကနေ ချဉ်းကပ်ပြီး​တော့ ဖြေရှင်းတဲ့ နည်းတစ်ခုပဲဖြစ်ပါတယ်။ ဒီနည်းလမ်းဟာဆိုရင် လူကို ဗဟိုပြု ဖြေရှင်းတာပဲဖြစ်ပါတယ်။

ပြဿနာဖြေရှင်းဖို့ နည်းလမ်းတွေအများကြီးရှိပါလျက် ဒီ Design Thinking process နဲ့ ဖြေရှင်းခြင်းဟာ အဓိကအားဖြင့် လူသားတွေရဲ့လိုအပ်ချက်တွေကို နားလည်ပြီး ဘယ်လိုမျိုးဖြေရှင်းပေးရမလဲဆိုတာကို စဥ်းစားအဖြေထုတ်တာပဲ ဖြစ်ပါတယ်။

ဒီနည်းလမ်းဟာဆိုရင် နိုင်ငံတကာက ထိပ်တန်း ဒီဇိုင်းနဲ့ စီးပွားရေးကျောင်းတွေမှာ သင်ကြားပေးနေတဲ့နည်းလမ်း တစ်ခုပါ။ ဒီနည်းနဲ့ စီးပွားရေးလုပ်တဲ့သူတွေကို ကြည့်လိုက်ရင် သူတို့ရဲ့ ဝယ်သူတွေဟာ စိတ်ကျေနပ်မှုတွေရရှိနေတာကို တွေ့ရပြီးတော့ စွန့်ဦးတီထွင်သူတွေအတွက်လဲ ဒီနည်းလမ်းက များစွာအထောက်အကူပြု​နေပါတယ်။

Design Thinking Process မှာဆိုရင် အဆင့် (၅) ဆင့် ရှိပါတယ်။

Empathize

Define

Ideate

Prototype

Test

1. Empathize (မျှ​ဝေခံစားကြည့်ပါ)

ပထမဆုံးအဆင့်အနေနဲ့ နားထောင်ပါ။ လူတွေရဲ့လိုအပ်ချက်တွေ၊ ခံစားချက်တွေကို နားထောင်ပြီး ကိုယ်တိုင် မျှဝေခံစားကြည့်ပါ။ သူတို့ နေ့စဉ်ဘဝမှာ ဘာတွေလိုအပ်နေလဲ ၊ ဘာအခက်အခဲတွေနဲ့ ရင်ဆိုင်နေရလဲဆိုတာကို သိဖို့အတွက် သူတို့ကို မေးခွန်းတွေမေး၊ အင်တာဗျူးတွေလုပ်ပြီး သူတို့နဲ့အတူ ကိုယ်တိုင်ထပ်တူခံစားကြည့်ပါ။ ဒါမှသာ သူတို့ရဲ့ လိုအပ်ချက်တွေကိုသိပြီး နည်းလမ်းရှာဖို့ နောက်တစ်ဆင့်ကို ဆက်လို့ရမှာပါ။

2. Define (ပြဿနာကို​ပေါ်လွင်​​အောင်စဥ်းစားပါ)

ဒီအဆင့်ဟာဆိုရင်တော့ အပေါ်ကအဆင့်မှာ မေးမြန်းလို့ သိလာရတဲ့အချက်အလက်တွေကို စုဆောင်းပြီးတော့ သူတို့ရဲ့ အခက်အခဲ၊ ပြဿနာတွေကဘာလဲ၊ သူတို့က ဘာတွေလိုအပ်နေတာလဲ ဆိုတာကို စဉ်းစား အဖြေထုတ်တဲ့ အဆင့်ပဲ ဖြစ်ပါတယ်။

သိရှိလာတဲ့ အချက်အလက်တွေကို ဆန်းစစ်ပြီးတော့ ပြဿနာတွေကို အစဉ်လိုက်စီပါ။ ပြီးတဲ့အခါမှာ ဘယ်ဟာတွေကအဓိကပြဿနာလဲ၊ ဘယ်ဟာတွေက သာမန်အခက်အခဲတွေလဲ၊ ဘယ်ဟာတွေကတော့ ငါတို့ လေ့လာရမယ့်ဟာလဲ ဆိုတာကို အတွင်းကျကျစဉ်းစားပါ။ ဒီလို ပြဿနာကိုစဉ်းစားတဲ့အခါမှာ ကုမ္ပဏီ၊ လုပ်ငန်းဘက်ကစဉ်းစားမယ့်အစား လူတွေကို ဗဟိုပြုထားပြီးတော့ စဉ်းစားပေးရမှာ ဖြစ်ပါတယ်။

3. Ideate (အကြံဉာဏ်​တွေ ထုတ်​ဖော်ပါ)

ဒီအဆင့်မှာဆိုရင်တော့ ပြဿနာကဘာလဲဆိုတာသိပြီး ဘယ်လိုဖြေရှင်းမလဲဆိုတာကို အကြံတွေဝိုင်းထုတ်ရမှာပါ။ ဒီအချက်ဟာဆိုရင် အကောင်းဆုံးအဖြေကို ရှာဖွေဖို့မဟုတ်ပါဘူး။ ကိုယ်ရလာသမျှ အကြံတွေအကုန်လုံးကို ချရေးထားပါ။

မတူညီတဲ့ရှုထောင့်အမျိုးမျိုးကနေ ဆန်းသစ်တဲ့ အကြံဉာဏ်တွေထုတ်ပါ။ ကိုယ့်ရဲ့ အကြံဉာဏ်တွေက ဘယ်လိုရှိတယ်ဆိုတာကို လူတွေကိုပြောပြပါ။ ဒါမှသာ သူ့တို့ဘယ်လို တုံ့ပြန်မလဲသိရမှာပါ။

4. Prototype (​ရှေ့​ပြေးပုံစံအကြမ်း ​ရေးဆွဲကြည့်ပါ)

အပေါ်အဆင့်မှာ မတူညီတဲ့ အကြံဉာဏ်တွေကို ထုတ်ပြီးသွားပြီဆိုရင် သင်တို့ရဲ့ အကြံဉာဏ်တွေဟာ လူတွေရဲ့နေ့စဉ်ဘဝမှာ ကိုက်ညီမှုရှိရဲ့လား ဆိုတာကို အချိန်အနည်း ငယ်ယူပြီး ပြန်စဉ်းစားကြည့်ပါ။

သင်တို့ရဲ့ အကြံဉာဏ်တွေဟာဆိုရင် အကြံဉာဏ်သစ်တွေပေါင်းပြီး ဖြစ်လာတာလည်း ဖြစ်ချင်ဖြစ်မယ်၊ ဒါမှမဟုတ် သူများအသုံးပြုပြီးသား လည်း ဖြစ်ချင်ဖြစ်မယ်။ ဒါပေမယ့် သင့်ရဲ့နောက်ဆုံးအဖြေကို ရရှိနိုင်ဖို့အတွက် လက်တွေ့ကျပြီး အလုပ်ဖြစ်နိုင်တယ်လို့ ထင်တဲ့အကြံဉာဏ်ကို ပုံဖော်ကြည့်ပါ။ ပြဿနာနဲ့ အကိုက်ညီဆုံး အကြံ သို့မဟုတ် အ​ဖြေ တစ်ခုကိုရှာတွေ့ပြီဆိုရင် အဲ့ဒါကို အကောင်အထည်ဖော်နိုင်ဖို့အတွက် ရိုးရှင်းပြီး စမ်းသပ်ဖို့လွယ်တဲ့ ရှေ့ပြေးပုံစံ သို့မဟုတ် ပုံကြမ်းကိုအကောင်အထည်ဖော်ရမှာပါ။ စမ်းသပ်ချက်တွေပြုလုပ်ပါ။ နမူနာပုံစံတွေဖော်ထုတ်ပါ။

5. Test (​ စမ်းသပ်စစ်​ဆေးပါ)

စျေးဝယ်ရင် ပစ္စည်းတစ်ခုမဝယ်ခင် ကောင်းမကောင်းကို အရင်ဆုံးစမ်းကြည့်ပြီးမှ ဝယ်ကြတယ်မလား။ ထိုနည်းလည်းကောင်းပါပဲ။ အပေါ်မှာ ကိုယ်ပြုလုပ်ထားတဲ့ ရှေ့ပြေးပုံစံ၊ နမူနာပုံစံက အဆင်ပြေ၊ မပြေ သိရဖို့အတွက် ပထမဆုံးအဆင့်မှာ မေးမြန်းထားတဲ့ လူတွေကို ပြပြီးစမ်းသပ်ပါ။ သူတို့ပေးတဲ့ ဘယ်အကြံပြုချက်ကိုမဆို လက်ခံပါ။ ဒါမှသာ ဘာတွေလိုအပ်နေသေးတယ်၊ ဘယ်အပိုင်းကို ပြန်ပြီးလေ့လာဖို့လိုသေးတယ် ဆိုတာကိုသိရှိပြီး ပြင်ဆင်နိုင်မှာပါ။

ပြီးရင်​တော့ ရှေ့က အဆင့်တွေကိုပြန်သွားပြီး ကိုယ်လေ့လာထားတဲ့ အရာတွေကို ပြန်အသုံးချပါ။ တစ်ကြိမ်ထဲ စမ်းသပ်ပြုလုပ်ထားတဲ့ ရလဒ်ဟာဆိုရင် ဘယ်လိုမှ မပြီးပြည့်စုံနိုင်ပါဘူး။ လိုအပ်ချက်တွေ ရှိနေနိုင်ပါသေးတယ်။ ဒါကြောင့် ပြဿနာနဲ့ အကိုက်ညီဆုံးဖြစ်မယ့် အဖြေရတဲ့အထိ ဒီ Design Thinking အဆင့် ငါးဆင့်ကို ထပ်ခါထပ်ခါအသုံးပြုပါ။ ဒီလိုပြုလုပ်ခြင်းဟာဆိုရင် အကြံဉာဏ်ကောင်း အသစ်တွေကိုလဲ ထပ်မံရရှိစေမှာပါ။ဒါကို​တော့ Design Thinking Cycle လို့​ခေါ်ပါတယ်။

ကဲ ဒါဆိုရင် ဒီနေ့ပြောပြလိုက်တဲ့ Design Thinking process ကို စာဖတ်သူတွေ နားလည်သိရှိသွားမယ်ထင်ပါတယ်။ နောက်ထပ် ဗဟုသုတရစေမယ့် အကြောင်းအရာတွေ၊ အစီအစဉ်တွေကိုလည်း ဖော်ပြပေးသွားမှာဖြစ်လို့ Beatrix Page မှာစောင့်ကြည့်ဖို့မမေ့နဲ့​နော်။

ဖတ်ရှုပေးတဲ့ တစ်ယောက်ချင်းစီတိုင်းကိုလည်း ကျေးဇူးတင်ပါတယ်။

Reference:

https://youtu.be/_r0VX-aU_T8

Written By,

Grace