“သင်ရော ခွင့်လွှတ်တတ်ပြီလား… ❔"

 

အားလုံးပဲမင်္ဂလာပါရှင်။ Beatrix ကနေပြန်လည်ကြိုဆိုလိုက်ပါတယ်။ ခေါင်းစဉ်လေးကိုမြင်တာနဲ့ စိတ်ဝင်စားသွားကြပြီဟုတ်။ ဒါဆို ဒီနေ့မှာ ဘယ်လိုအကြောင်းအရာလေးကို ပြောပြပေးသွားမလဲဆိုတာ ဆက်ပြီးဖတ်ကြည့်ပေးနော်။

Written by

Pyae

Ref:https://thriveworks.com/blog/7-steps-to-true-forgiveness/

 

 

လူတိုင်းရဲ့ဘဝမှာ ကိုယ့်ကိုတစ်စုံတစ်ယောက်က စိတ်ပိုင်းဆိုင်ရာဖြစ်ဖြစ်၊ ရုပ်ပိုင်းဆိုင်ရာဖြစ်ဖြစ် ထိခိုက်နာကျင်အောင်လုပ်တာ ခံဖူးကြပါလိမ့်မယ်။ အဲ့ဒီအခါမှာ ကိုယ့်ဘက်ကဘယ်လိုတွေတုံ့ပြန်ခဲ့လဲ? အဲ့လူလုပ်ခဲ့တာတွေကြောင့်ပဲနေ့တိုင်းစိတ်ညစ်နေရလား?

သူ့ကိုပြန်ပြီး ဒုက္ခရောက်အောင်လုပ်မယ်လို့တွေးဖူးလား?

အဲ့လို စိတ်ညစ်နေရတာတွေကနေ လွတ်မြောက်ဖို့အ ကောင်းဆုံးနည်းကတော့ "ခွင့်လွှတ်ခြင်း" ပါပဲ။

"ခွင့်လွှတ်ခြင်း" ဆိုတာကတော့ ကိုယ့်အပေါ်မှားခဲ့တဲ့သူကြောင့် ဖြစ်လာတဲ့ ခါးသီးမှုတွေ၊ ဒေါသတွေ၊ စိတ်ညစ်စရာတွေ စတဲ့ခံစားချက်တွေ အားလုံး ကိုလွတ်လပ်ခွင့်ပေးနိုင်တဲ့အထိလုပ်ယူရတဲ့ process တစ်ခုပါပဲ။ ဖြစ်ခဲ့သမျှကို အပြီးမေ့ပစ်လိုက်တာ၊ လျစ်လျူရှုလိုက်တာမျိုး မဟုတ်ပါဘူးနော်။ ခွင့်လွှတ်တယ်ဆိုတာရိုးရှင်းလွယ်ကူတဲ့ကိစ္စတော့မဟုတ်ဘူး။ ဘာလို့ဆို ကိုယ့်ကိုနာကျင်အောင် လုပ်ထားတဲ့သူကို ဘာမှမဖြစ်သလို လျစ်လျူရှုထားဖို့ဆိုတာ မဖြစ်နိုင်ဘူးလေ ဟုတ်တယ်ဟုတ်?

ကိုယ်တကယ်ခွင့်မလွှတ်နိုင်သေးဘဲနဲ့ ခွင့်လွှတ်ချင်ယောင် မဆောင်ပါနဲ့။ ခွင့်လွှတ်ခြင်းဆိုတာ "ငါမင်းကိုခွင့်လွှတ်တယ်" ဆိုတဲ့စကားတစ်ခွန်း ပြောလိုက်တာနဲ့ ပြီးသွားမယ့်ကိစ္စ မဟုတ်ပါဘူး။

 

လူတော်တော်များများက ခွင့်လွှတ်ခြင်းဟာ လူကောင်းတွေရဲ့အလုပ်လို့ ယူဆတာကြောင့်တစ်မျိုး၊ ပတ်ဝန်းကျင်ကဖိအားပေးလို့တစ်ဖုံ မှားယွင်းတဲ့ရည်ရွယ်ချက်တွေနဲ့ ခွင့်လွှတ်နေကြတာပါ။ ခွင့်လွှတ်တယ်ဆိုတာ ရွေးချယ်မှုတစ်ခုပါ၊ ခံစားချက်မဟုတ်ပါဘူး။ မကောင်းတဲ့ခံစားချက်တွေ၊ အတွေးတွေကနေ လွတ်မြောက်ဖို့ ကိုယ်ကိုယ်တိုင်လုပ်ယူရတဲ့ process ပါပဲ။

ဒါဆို လုပ်ဖို့မလွယ်တဲ့ ခွင့်လွှတ်ခြင်းကိုလုပ်နိုင်အောင် ဘယ်လိုအဆင့်တွေနဲ့ကျော်ဖြတ်ကြမလဲ

ကိုယ့်နာကျင်မှုကို သိအောင်လုပ်ပါ။

ကိုယ့်ကို ဘယ်သူက နာကျင်အောင် လုပ်တာလဲ? ဘာကြောင့်လဲ?

ကိုယ်ရော ဘယ်လောက်ထိ နာကျင်ခဲ့ရပြီးပြီလဲ?

နာကျင်မှုဟာကိုယ့်ကိုဘယ်လိုတွေပြောင်းလဲခဲ့ပြီလဲ?

ခွင့်လွှတ်မယ် ခွင့်မလွှတ်ဘူး မဆုံးဖြတ်ရသေးခင်မှာ အဲ့ဒီ အဖြစ်အပျက်ကနေရလာတဲ့ မကောင်းတဲ့ခံစားချက်တွေကို အရင်စဉ်းစားပါ။

အရှိကို အရှိအတိုင်းလက်ခံပါ။

အတိတ်ဟာ ပြန်ပြင်လို့မရတော့ဘူးဆို တာသိထားပါ။ ကိုယ့်ကို နာကျင်အောင်လုပ်သွားတဲ့လူကို ဒေါသတွေထွက်နေလည်း ဖြစ်ခဲ့တဲ့ကိစ္စက ပျောက်သွားမှာ မဟုတ်ဘူးဆိုတာကိုလက်ခံပါ။ ဒီအဆင့်ဟာ ကိုယ်သူ့ကိုခွင့်လွှတ်သင့်လား မလွှတ်သင့်ဘူးလား သေချာစဉ်းစားရမ ယ့်အဆင့်ပါပဲ။

ဆုံးဖြတ်ပါ။

သေချာစဉ်းစားပြီးပြီဆိုရင်တော့ ဆုံးဖြတ်ချက်ချပါ။ ကိုယ့်ဆုံးဖြတ်ချက်ပေါ်မူတည်ပြီး ခွင့်လွှတ်ခြင်းရဲ့ အစ ဒါမှမဟုတ် အဆုံးဖြစ်သွားနိုင်ပါတယ်။ ဒီဆုံးဖြတ်ချက်ဟာ အဲ့ဒီလူနဲ့သင်ရဲ့ ဆက်ဆံရေးကို ဆက်ပြီး အကျိုးသက်ရောက်သွားမှာမို့ ပေါ့ပေါ့တန်တန်မတွေးပါနဲ့။

ဆက်ဆံရေးတွေကိုပြန်လည်ပြုပြင်ပါ။

အကယ်၍ကိုယ့်ကို နာကျင်အောင်လုပ်တဲ့သူဟာတမင်မရည်ရွယ်ဘဲဖြစ်သွားတာမျိုးဆိုရင်တော့ သူနဲ့အရင်တုန်းကရှိခဲ့ဖူးတဲ့ ဆက်ဆံရေးမျိုးပြန်ရအောင်တည်ဆောက်ပါ။ ဒါမှမဟုတ် နောက်ထပ် ကိုယ့်ကိုနာကျင်အောင်လုပ်မယ့်လူမျိုးဆိုရင်တော့း ထပ်ပြီးမပတ်သက်တော့တာအကောင်းဆုံးပါပဲ။

ခွင့်လွှတ်ခြင်းဟာ ဘယ်လိုမျိုးလဲဆိုတာကို နားလည်အောင်လုပ်ပါ။

ခွင့်လွှတ်တယ်ဆိုတာသူများအတွက်လို့ ထင်ကောင်းထင်ပါလိမ့်မယ်။ တကယ်တော့မဟုတ်ပါဘူး။ သူများကိုခွင့်လွှတ်လိုက်တာဟာ ကိုယ့်အတွက်ကိုယ်လုပ်တာ၊ ကိုယ်ကိုယ်တိုင်ရဲ့လွတ်မြောက်ခြင်းပေါ့။

ခွင့်လွှတ်လိုက်ပါ။

ကိုယ့်အပေါ်အမှားလုပ်ခဲ့တဲ့လူကို ခွင့်လွှတ်လိုက်ပါ။ ဒီအဆင့်ဟာခက်ခဲနိုင်သေးပေမယ့် ကိုယ်တကယ်ခွင့်လွှတ်နိုင်သွားတဲ့အချိန်မှာ သူတို့ဆီကတုံ့ပြန်မှုက ကိုယ့်အတွက်အရေးမပါတော့ပါဘူး။ တကယ် အရေးပါတာက ကိုယ်ဟာ ဖြစ်ခဲ့သမျှကို လက်လွှတ်နိုင်ပြီး လွတ်မြောက်သွားတဲ့နည်းလမ်းကို တွေ့ခဲ့တာပဲမဟုတ်လား?

ခွင့်လွှတ်လိုက်ခြင်းဟာ အားနည်းချက်တစ်ခုမဟုတ်ပါဘူး။ တကယ်ကိုရင့်ကျက်တဲ့လူတွေမှသာလုပ်နိုင်တဲ့ စွမ်းအားကြီးတဲ့အရည်အချင်းတစ်ခုပါပဲ။ ခွင့်မလွှတ်နိုင်လို့ လက်စားချေဖို့မကြိုးစားပါနဲ့။ လက်စားချေတာဟာ ကိုယ့်ကို ပိုပြီးနစ်မွန်းစေမှာပါ။ ခွင့်လွှတ်ပြီးတဲ့နောက် နာကျင်မှုတွေ၊ ခါးသီးမှုတွေ၊ ဒေါသတွေအားလုံးကိုလွှတ်ချလိုက်တဲ့အခါ ကိုယ်ဟာလူသစ်တစ်ယောက်လိုပြန်ဖြစ်သွားပြီး ဘဝကိုလွတ်လပ်ပျော်ရွှင်စွာနေထိုင်နိုင်ပါလိမ့်မယ်။

ကဲ… ဒီတော့စာဖတ်သူတွေထဲမှာလည်း ကိုယ့်အပေါ်အမှားလုပ်ထားတဲ့လူတွေရှိနေရင် အခု ပြည့်ရေးထားတာလေးကိုဖတ်ပြီး အတတ်နိုင်ဆုံးခွင့်လွှတ်နိုင်ကြပြီးတော့ ပေါ့ပေါ့ပါးပါးနဲ့ဘဝကိုဖြတ်သန်းနိုင်ကြပါစေနော်...။