Do and Don`t before blood donation

 

Hello! အားလုံးပဲ မင်္ဂလာပါရှင်။

Beatrixers တွေထဲမှာ အခုမှ ပထမဆုံး သွေးလှူမယ့် အလှူရှင်တွေရှိလား? သွေးတော့လှူချင်တယ် ဆောင်ရန်၊ ရှောင်ရန်တွေမသိဘူးဆိုတဲ့ သွေးလှူရှင်တွေအတွက် ဒီအပတ်မှာတော့ သွေးမလှူဒါန်းခင်နဲ့ သွေးလှူပြီး အချိန်တွေမှာ သိသင့်သိထိုက်တဲ့အကြောင်းအရာတွေ၊ ဆောင်ရန်၊ ရှောင်ရန်တွေ၊သွေးလှူပြီးနောက် ဖြစ်လာနိုင်တဲ့ ခန္ဓာကိုယ်ကတုံ့ပြန်မှုတွေကို ဗဟုသုတရစေဖို့ တင်ဆက်ပေးလိုက်ပါတယ်နော်။ အားလုံးပဲ စိတ်ဝင်စားကြမယ်လို့ မျှော်လင့်ပါတယ်။

Written by

Pyae

 သွေးမလှူဒါန်းခင် ဘာတွေဆောင်သင့်/ ရှောင်သင့်လဲ

သွေးမလှူခင် အင်အားပြည့်ပြည့်ဝဝနဲ့ လန်းဆန်းတက်ကြွမှုရှိစေရန် အိပ်ရေးဝဝအိပ်ဖို့ အရမ်းလိုအပ်ပါတယ်။

သွေးလှူတဲ့အခါ ခန္ဓာကိုယ်ကရေဓာတ်တွေဆုံးရှုံးစေနိုင်တဲ့အတွက် မလှူခင် ရေ 16oz (သို့မဟုတ်) ၂ ခွက်ခန့်သောက်သုံးပေးသင့်ပါတယ်။

အရက်သောက်ခြင်းဟာ ခန္ဓာကိုယ်မှာရှိတဲ့ ရေဓာတ်ကို ခမ်းခြောက်စေနိုင်တာကြောင့် သွေးမလှူခင် ၂၄ နာရီအတွင်း အရက်သေစာ မသောက်သုံးသင့်ပါဘူး။

အဆီများတဲ့ အစားအစာတွေဟာ သွေးကိုစစ်ဆေးတဲ့အခါမှာ အနှောင့်အယှက်ဖြစ်စေတာကြောင့် သွေးမလှူခင် အဲ့လိုအစားအစာတွေကို စားသုံးဖို့မသင့်ပါဘူး။

သွေးမလှူခင် ၂ ရက်(သို့မဟုတ်) ၂ ပတ်ခန့် အလိုမှာ သံဓာတ်ကြွယ်ဝတဲ့ အစားအစာတွေ (ဥပမာ- အမဲသား, ကြက်သား, ငါး,ရွှေဖရုံသီး) ကိုစားသုံးပေးသင့်ပါတယ်။ ဒါမှသာ ခန္ဓာကိုယ်က သံဓာတ်ကို လုံလောက်စွာ သိမ်းဆည်းထားနိုင်ပြီး သွေးလှူပြီးတဲ့အခါ အားနည်းခြင်းမျိုးမဖြစ်အောင် ကာကွယ်ပေးနိုင်မှာပါ။

သွေးမလှူခင် ၂ နာရီ (သို့မဟုတ်) ၃ နာရီအလိုမှာ ထမင်း ဒါမှမဟုတ် အခြားအစားအစာတစ်ခုခု စားထားဖို့လိုအပ်ပါတယ်။

Vitamin C ပါဝင်တဲ့ အစားအစာတွေဟာ သံဓာတ်စုပ်ယူမှု အားကောင်းတာကြောင့် များများစားသုံးပေးသင့်ပါတယ်။သွေးလှူဒါန်းပြီးရင် ဘာတွေဆောင်သင့်/ ရှောင်သင့်လဲ

သွေးလှူပြီးပြီးချင်းမှာ ၁၀ မိနစ်ခန့် ထိုင်နေ/ လှဲနေသင့်ပါတယ်။

သွေးလှူပြီးတဲ့အခါ ခန္ဓာကိုယ်ထဲမှာ အရည်ပမာဏ လျော့နည်းသွားတာဖြစ်တဲ့အတွက် ပုံမှန်ထက် ရေများများပြန်သောက်ပေးဖို့ လိုအပ်ပါတယ်။

ပြင်းထန်တဲ့ လေ့ကျင့်ခန်းတွေဟာ မူးမော်တာတွေ ဖြစ်စေပြီး သွေးဖောက်ထားတဲ့နေရာမှာ သွေးတွေဆက်ထွက်နေတာမျိုးတွေ ဖြစ်စေတာကြောင့် သွေးလှူပြီးနောက် ၂၄ နာရီအတွင်း အလေးအပင်မတာတွေ၊ လေ့ကျင့်ခန်းတွေ မလုပ်သင့်ပါဘူး။

သွေးလှူပြီး ၁၂ နာရီအတွင်း အရက်/ ဘီယာသောက်ခြင်းမျိုးကို လုံးဝရှောင်ကြဉ်သင့်ပါတယ်။

သွေးဆဲလ်တွေကို ထုတ်လုပ်ရာမှာ အဓိကအရေးပါတဲ့ သံဓာတ်စုပ်ယူမှုကို တားမြစ်စေတဲ့ အစားအသောက်တွေ (ဥပမာ- ကော်ဖီ, လက်ဖက်ရည်, ချောကလက်) စားသုံးခြင်းမှ ရှောင်ကြဉ်သင့်ပါတယ်။

သွေးနီဥတွေ ထုတ်လုပ်ရာမှာ များစွာအထောက်အကူပြုတဲ့ ဗီတာမင် B2 နဲ့ B6 ပါဝင်တဲ့ အစားအစာတွေ (ဥပမာ- အာလူး, ငှက်ပျောသီး)၊ သံဓာတ်ကြွယ်ဝတဲ့ အစားအစာတွေ (ဥပမာ- အသား,ငါး, မြေပဲ, အစေ့အဆံ) ကိုစားသုံးပေးသင့်ပါတယ်။

အပူဟာ ခန္ဓာကိုယ်မှာရှိတဲ့ သွေးကြောတွေကို ကျယ်စေပြီး သွေးပေါင်ချိန်ကျစေနိုင်တာကြောင့် သွေးလှူပြီးချိန်မှာ ရေပူနဲ့ရေချိုးခြင်းမျိုးကို ရှောင်ကြဉ်သင့်ပါတယ်။ နောက်ဆုံးအနေနဲ့ကတော့ သွေးလှူပြီးရင် ဖြစ်လေ့ဖြစ်ထရှိတဲ့ ခန္ဓာကိုယ်က တုံ့ပြန်မှုတွေကို ပြောပြပေးသွားမှာပါ။

သွေးလှူပြီး ရုတ်တရက်ထလိုက်တဲ့အခါ (သို့မဟုတ်) သွေးအားနည်းနေတဲ့အခါမှာ မူးဝေတာတွေ၊ မေ့လဲတာတွေ ဖြစ်တတ်ပါတယ်။ ဒါဟာ စိုးရိမ်စရာ မလိုပါဘူး။ အဲ့လိုတွေဖြစ်ခဲ့ရင် လူကိုလှဲ‌ပေးပြီး ခြေထောက် ၂ ဖက်ကို‌ ထောင်ထားပေးခြင်းဖြင့် ပြန်လည်ကောင်းမွန်လာနိုင်ပါတယ်။

တစ်ခါတစ်ရံ သွေးဖောက်ထားတဲ့နေရာမှာ အမာရွတ်ဖြစ်သွားနိုင်သလို အညိုအမည်းတွေလည်း ဖြစ်နိုင်ပါတယ်။အဲ့ဒီလိုဖြစ်ခြင်းက ဘာအန္တရာယ်မှ မရှိပါဘူး။ အချိန်အနည်းငယ်ကြာရင် ပျောက်ကင်းသွားနိုင်ပါတယ်။

သွေးလှူထားတဲ့ လက်မောင်းမှာ ကိုက်ခဲတာတွေလည်း ဖြစ်တတ်ပါတယ်။ အဲ့လိုဖြစ်လာရင် အကိုက်အခဲပျောက်ဆေး သောက်ပေးရုံနဲ့ ပျောက်ကင်းနိုင်ပါတယ်။

ခုဆိုရင်တော့ သွေးလှူရာမှာ ဆောင်ရ၊ ရှောင်ရမှာတွေလည်း သိသွားပြီမို့ အားလုံးပဲ ဒီ covid ကာလအတွင်းမှာ အန္တရာယ်ကင်းကင်းနဲ့ သွေးလှူနိုင်ကြပြီး မွန်မြတ်တဲ့ကုသိုလ်တွေ ရရှိကြပါစေရှင်။